20‏/09‏/2011

حنفي في المعمل

امبارح حاولت اثبات ان السعادة و الامل صناعة شخصية اكتر منها لين الظروف او افراد حوالينا بيسعدونا .....


و بناء علي كده قلت هسعد نفسي و اعمل تورتتي بايدي ما هو عيد ميلادي بقي و ماحدش هيحس بالفرح بيه قدي بالحاجة الحلوة


طبعا بناء علي القرار الخطير كان لازم اخد احتياطات امنية و زمنية


امنية : علشان ماما ماتعرفش بالكارثة اللي هتضرب مطبخها العزيز اللامع
و زمنية : علشان الحق اجهزها قبل ما بابا يروح يجيب تورتة او ان ماما تعملها بنفسها


حضرت مكوناتي و اخدت كل الاحتياطات .................. تقريبا كل الاحتياطات!!!!!


طبعا كان لازم يكون في عناصر مساعدة خارجية و داخلية فاستعنت بسها اختي علشان تتعلم من جهبذ الطبخ اللي هو......انا  :D:D:D


و حازم اخويا الصغنطط علشان يكعبل اي حد يفكر يدخل المطخ او يطلق سارينة الانذار - صراخه المميز - لو حد  معرفش يكعبله و معاه 
فيتو - ماما او بابا - طبعا


التورتة في الطبيعي زي ما الوصفة بتقول تحضيرها و تزينها كله مايخدش منك اكتر من ساعتين بالكامل بس مع مين ده انا العلامةاخدت معايا 4 ساعات الحمدلله الضعف بالظبط :D:D:D


الفكرة مش في الوقت و لا الفكرة ان حازم اول ما شاف الشكولاتة تنازل عن موقعه  -و من هنا اتقفشنا - و بدء يشارك بايديه و هدومه معانا و لا ان المطبخ كان في شكولاتة و ايس كريم لازق من اول اوكرة باب المبطخ لحد الشبابيك و وشنا


بس الفكرة السعادة اللي كنا فيه و الضحك اللي قضيناه لما كانت سها عمالة تقطع كل شوية من الكيكة قبل التزيين و تخبيها و تختفي و نكتشف انها بتاكل الكيكة للكتكوت بتاعها
و لا حازم اللي كان يحط معلقة شكولاتة عالكيكة و معلقة تانية في بؤه و لما تزعقله يبصلك بعينيه الصغنطوط و يكلمك بكل براءة دي هي واحدة بس :D:D


و لما الخلاط نسيت اقفله و شغلته و غرقت انا و سها بالعصير اللي فيه


هو صحيح التورتة مكانتش عالمستوي بتاع الصورة نهائي بس كنت اللوم مين و لا ازعل ليه ما هو ده جهل مني مش ذنب حد لولا اني ماكنتش اعرف ان الحاجات الخفيفة مايتحطش فيها الكيك مكانش نص الكيكة اتحرق


و لولا ان جهلي كان سبب اني ماعرفش ان لازم اسيبها تبرد قبل ما قطعها ديسكات مكانتش فرولت مني......


تعريف السعادة فعلا مش بالامر الهين و انك تعرف تعد مصادر سعادتك برضوا صعب لان قد ايه احنا حوالينا حاجات تفرحنا و مش واخدينا بالنا منها ممكن تكون حاجات صغيرة بس لو حاولنا ننهل منها بالقدر الكافي هتروينا سعادة


صحيح مصادر السعادة كتير بس خريطتنا لمعرفتها بنهملها و مصادر حزننا ممكن نبعد عنها بس احنا اللي بنرمي نفسنا وسطيها


يمكن اللي عرفته بعد ما خلصت تنضيف المطبخ ان احنا بكل اللي عملناه بسيط بس صنعنا ذكريات سعيدة هفتكرها ان شاء الله و احكي لولادي وولاد اخواتي عنها و عن مغامراتنا


زي ما حلبات المصارعة اللي بنلعبها كلنا او بلاك شوز او لعبة الحيوانات


يمكن اثباتي الاولاني مكانش دقيق اوي بس اللي دقيق اوي اني اتعلمت ماهربش لزمان و لا افضل اتخيل المستقبل و ان اعيش كل يوم و اصنع الذكريات المسكرة الملغوصة دي كتير


  العجيب بقي في الامر ان بعد ما خلصت التورتة بابا لما شافها ابتسم و قال ما شاء الله حلوة -لارضائي مش اكتر انا عارفة صعبت عليه - و باسني علي خدي و علي راسي


اما ماما حبيبتي لما شافتها  مكانتش عارفة تفرق بالظبط اذا كانت تورتة فعلا و لا اختراع من اختراعاتي الجهنمية في ارض العجائب و قعدت تضحك و كانت مصرة انها تعملي واحدة و تواريني بتتعمل ازاي بس انا مقتنعة بيها و دي اللي هطفي فيها الشمع ان شاء الله النهاردة


اما مصدر السعادة التاني بجانب عيلتي الحبيبة هو اغلي اصحاب في الدنيا دي كلها اللي اول ما فتحت لاقيتهم فاكريني و عيدوا عليا و رسمولي احلي ابتسامة علي وشي


الـــــــــــــحــــــمــــــــد لــــــلـــــــــــه